د چارچۆڤێ کار و چالاکییێن خۆ یێن جڤاکی دا و ل ژێر سیبەر بجهئینانا بەرنامێ "دەزگایێ زەکاتا زانستی"، رۆژا چوارشەمبی رێکەفتی ١٧ی حوزەیرانا ٢٠٢٦ێ، زانکۆیا جیهان-دهۆک رێکەفتنامەکا هەڤکاریێ و لێکتێگەهشتنێ یا ستراتیژی دگەل قائیمقامیا قەزا سێمێلێ ئیمزا کر.

رێورەسمێن ئیمزاکرنێ ب ئامادەبوونا پ. د. زیرڤان عبدالمحسن أسعد (سەرۆکێ زانکۆیێ) و رێزدار دژوار شوکت طاهر (قائیمقامێ قەزا سێمێلێ) و ب پشکداریا رێڤەبەرێن پەیوەندیدار و رێڤەبەرێن هەر چوار ناحیێن سەر ب قەزایێ ڤە (تەناهی، مسێریک، خانکێ، فەیدیێ) برێڤە چوو.

ئەڤ رێکەفتنامەیە ل سەر دوو تەوەرێن سەرەکی کار دکەت:
١. پێشکێشکرنا خزمەتگۆزاریێن زانستی، ئەکادیمی، هوشیاری و کارێن خۆبەخشی بۆ هەمی تەخ و چینێن جڤاکی.
٢. پەرەپێدان و بهێزکرنا شیانێن پیشەیی و بەهرەیی یێن فەرمانبەرێن دەزگەهێن حوکمی و خەلکێ دەڤەرێ ب گشتی.

ژلایێ خوو، سەرۆکێ زانکۆیێ پێشنیارەکا ستراتیژی یا گرنگ پێشکێش کر، تێدا داخواز کر کو ژبەر پێگەهێ جوگرافی و ئابۆری و وەبەرهێنانێ یێ تایبەت یێ قەزا سێمێلێ، ئەڤ دەڤەرە ب فەرمی ببیتە «پایتەختێ وەبەرهێنانێ» ل دەڤەرێ، پێخەمەت راکێشانا پڕۆژێن گەشەپێدانێ یێن مەزن و گەشەکرنا ئابۆرێ خۆجهی ب شێوەیەکێ بەردەوام.