ل ڕێكه‌فتی 19/5/2026، ب ئاماده‌بوونا چەندین لژنێن پسپۆڕ یێن سەرپەرشت ل سەر ڤەکۆلینێن ده‌رچوونێ، قوتابیێن بەشێ کارگێڕی کار ل زانکۆیا جیهان-دهۆک، گه‌نگه‌شه‌ ل سەر ڤەکۆلینێن خۆ یێن ده‌رچوونێ كرن.

د ڤان گه‌نگه‌شه‌يان دا، گرنگترین ئەو بابه‌ت هاتبوونه‌ هه‌لبژارتن یێن كو په‌یوه‌ندی ب وارێ کارگێڕی، ئابووری و پێشڤەبرنا پڕۆژان ڤە هەی، دا كو چارەسەری و ستراتیژیێن زانستی بۆ کێشەیێن کارگێڕی یێن سەردەمانە د بازاڕی دا بهێنە دیارکرن. ژ لایێ خۆ ڤه‌، لژنێن سەرپەرشت ڤەکۆلینێن قوتابیان ل دویف پیڤەرێن زانستی و ئەکادیمی یێن دژوار هه‌لسه‌نگاندن، کو ئه‌ڤ چه‌نده‌ ژی دێ هاریكار بیت بۆ ئاڤاكرنا كه‌سایه‌تیا قوتابی وەک ڤەکۆلەر و ڕێڤەبەرێن سەرکەفتی د پاشەڕۆژا وان یا ئەکادیمی و پیشەیی دا.