ئەڤرۆ رێکەفتى (24/2/2022) زانکویا جیهان-دهوک بەشێ پەروەردا گشتى – پشکا دەروونناسى ب مەرەما خزمەتکرنا دەزگایێن پەروەردێ بتایبەت قوتابخانا، ورک شوپەک ل دۆر (رۆلێ خێزانێ د پەروەردەکرن و پێشڤەبرنا شیانێن قوتابیان) بو ماوێ ٣ روژان و هەر روژەک بو ماوێ دوو دەمژمێر و نیڤان بەردەوام بو ژلایێ خانم (پشکوش جعفر) ماموستایا بەشێ پەروەردا گشتى – زانکویا جیهان هاتە پێشكێشكرن بۆ سەمیانێن قوتابیان ب ئامادەبوونا بەرێز (نیهاد حسن) رێڤەبەرێ قوتابخانێ دگەل هاریکار و هژمارەکا ماموستایان.
د ورک شوپێ باس ل بابەتێ قوناغا زاروکینى و سنێلەیێ هاتە کرن کو قوتابیێن قوتابخانا حەوشکێ د ژیێ بنەرەتى دانە، ژلایێ خۆ سمینارگێرێ ئاماژە ب تایبەتمەندیێن زاروکینیێ ل هەردوو قوناغا کرن و مەترسی و گرنگى یا وان د ئاڤاکرنا کەسایەتیا زارۆکى، کو تیرۆژکێن پاشەرۆژا زارۆکى گرێدایە بنیاتێ درۆستێ ژینگەه و پەروەردا وەردگریت ژ قوتابخانێ و خێزانێ، ئەو ژینگەها زارۆک تێدا دەرباز دبیت چەند یا ساخلەم و ئارام و بێ دەنگ بیت بێ گومان دێ رەنگڤەدانا ئەرێنى لسەر کەسایەتى و پاشەرۆژا زاروکى هەبیت.
 
رێنما و ئامۆژگاریێن گرنگ بۆ دایک و بابان د ڤێ قوناغێ دا:
ـ هەڤسەنگى د پەروەردەکرنێ دا و گەلەک خۆ ڕادەستى حەز و داخازایێن زاروکا نەهێتە کرن بتنێ ئەگەر یا گرنگ نەبیت، و بەردەوام پەسنا زارۆکى بهێتە کرن و کارێن وى بهێنە مەزن کرن ئەگەر چەند د بچوویک بن، بۆ هندێ باوەرى ب خووبوون بۆ پەیدا بیت، هەروەسا فەرە دایباب دویر بکەڤن ژ شکاندن و پاشڤەبرنا زارۆکى بەرامبەر خەلکى، ئەگەر شاشیا وى چ بیت.

ـ دەستنیشانکرنا دەمەکى بۆ یاریان دگەل زارۆکان و ئەنجامدانا گەنگەشێ دگەل زارۆکى ل دەمێ ژیێ سنێلەییێ زۆرا گرنگە ژ پێخەمەت بهێزکرنا پەیوەندیێ دناڤبەرا دایباب و زارۆکان، و خۆ ل کێشە و بووچوونێن بکەنە خوادن.

ـ دایباب ببنە نموونە باش بۆ زارۆیێن خۆ کو چاڤ ل وان بکەن، چونکە رەفتار و رەوشتێ جوان یێ دایبابان بهێزترە و کارتێکرنا وێ پتر لسەر زارۆکى ژ ئامۆژگاریان.

ـ یا گرنگ ئەوە بارێ زارۆکى نەهێتە گران کرن کو ژ شیانێن وان مەزنتر بن، و جەخت لسەر شیان و هاندانا وان بهێتە کرن لسەر پێشڤەچوونێ باشترە ل شوینا بەراوردیا وان دگەل کەسانێن بەرامبەر بهێتە کرن.

ـ بەردەوام پشتەڤانیا زارۆکى بهێـە کرن بتایبەت ئارەزو و خەونێن وان، لێ دڤێت باش د هشیارى پشتەڤانیا لسەر شاشیێ بین، چونکە ئەڤ جورێ پشتەڤانیێ دەمى زارۆک شاشیەکێ دکەت چ ل قوتابخانێ یان ل مال دڤێت پشتەڤانى لێ نەهێتە کرن، چونکە دێ رەنگڤەدانا خۆ یا نەرێنى لسەر کەسایەتیا زارۆکى هێتە کرن.

ـ ل دوماهیێ فەرە هەر خێزانەکێ سیستەمەکێ جێگیر یێ شەنگستێن رەفتار و رەوشتان هەبیت کو هەمى ئەندامێن خێزانێ پەیرەو کەن بۆ هندێ زارۆک لسەر بهێتە فێرکرن و دەمێ خۆ ب باشترین شێوە ببورینیت دگەل دەستنیشانکرنا دەمێ پێتڤى بۆ خواندن و یارى و چالاکیێن خێزانى و جڤاکى.