ئەڤرۆ، رێکەفتی 2026/7/7، ب ئامادەبوونا بەرێزان پ. د. زیرڤان عبدالمحسن اسعد، سەرۆکێ زانکویا جیهان-دهۆک، و رێزدار سگڤان حسن علي، ڕێڤەبەرێ گشتی یێ پەروەردا پارێزگەها دهۆکێ، و رێزدار یحیى رضا، رێڤەبەرێ مەشق و ڕاهێنانێ ل وەزارەتا پەروەردێ یا حکومەتا هەرێما کوردستانێ، دگەل ڕێڤەبەرێن پەروەردێن (ڕۆژئاڤا، ڕۆژهەڵات، سێمێل، و ئامێدیێ) و ب ئامادەبوونا ڕێڤەبەرێ ئەکادیمیا جیهان، خولا پێنجێ یا ڕاهێنانا پێداگۆجی یا مامۆستایان ل زانکویا جیهان هاتە ڤەکرن.

ئەڤ خولە د چارچۆڤێ ئیمزاکرنا رێکەفتنامەیەکا لێکتێگەهشتنێ یە د ناڤبەرا سەرۆکێ دەستەیا ئەمینداریا زانکۆیێن جیهان و وەزارەتا پەروەردێ یا حکومەتا هەرێما کوردستانێ دا دهێتە ئەنجامدان.

د ڤێ خولێ دا کو ل بن چاڤدێريا لژنەکا تایبەت و ژ لایێ مامۆستایێن پسپۆر و ڕاهێنەرێن شارەزا ڤە دهێتە پێشکێشکرن، پێنج وانەیێن سەرەکی دێ هێنە گۆتن کو د دابەشکرینە لسەر ڤان بواران: (دەروونناسییا پەروەردەیی، پیڤان و هەلسەنگاندن، تەکنۆلۆجیا و ژیرییا دەستکرد، کارگێڕیا پۆلێ، و ڕێکێن وانەگۆتنێ).

هەژی گۆتنێیە کو د ڤێ خولێ دا (107) مامۆستایێن قوتابخانە و ئامادەییێن جودا جودا یێن سەر ب پەروەردا پارێزگەها دهۆکێ پشکدارن. ئارمانج ژ ڤێ خولێ پێشڤەبرنا شیانێن زانستی و پێداگۆجی یێن مامۆستایانە و ئامادەکرن بۆ خۆگۆنجاندن دگەل پێشکەفتنا بلەز یا تەکنۆلۆجیایێ و ڕێبازێن نویژەن یێن فێرکرنێ ل دویف ستانداردێن جیهانی.