بەشێ پەروەردەیا گشتی پانێلەکێ زانستی ل دۆر ساخلەمییا دەروونی و کێشەیێن جڤاکی سازکر

​ل رێکەفتی ١١ی شوباتا ٢٠٢٦ێ، بەشێ پەروەردەیا گشتی - پشکا دەروونناسی ل زانکۆیا جیهان-دهۆک پانێلەکێ زانستی ل ژێر ناڤونیشانێ “ساخلەمییا دەروونی و ڕاستییا جڤاکی: دیتنەکا شڕۆڤەکار بۆ دلتەنگی و خەمۆکییێ و ڕێکێن چارەسەریێ” ئەنجامدا. پانێل ب پشکداریا چەندین بسپۆر و ئەکادیمیان ب رێڤە چوو کو تێدا ئەڤ تەوەرێن ل خوارێ هاتنە گۆتوبێژکرن:

- ​تەوەرێ ئێکێ (لایەنێ کلینیکی): ژ لایێ پروفیسور د. برجان هاشم ئاکرەیی ڤە هاتە پێشکێشکرن، کو تێدا تیشک ئافێته سەر دەستنیشانکرنا دلتەنگی و خەمۆکییێ، نیشانێن سەردەم، و رێکێن نوو یێن چارەسەریێ.

- ​تەوەرێ دووێ (لایەنێ جڤاکی): ژ لایێ د. جبار قهار (ڤەکۆلەرێ جڤاکی) ڤە هاتە پێشکێشکرن، تێدا باس ل “شەرمزاریا جڤاکی” (الوصمة الاجتماعية) ل دۆر نەخۆشیێن دەروونی کر، دگەل رۆڵێ ژینگەها جڤاکی د زێدەکرن یان کێمکرنا ڤان حالەتان دا.

- ​تەوەرێ سێیێ (لایەنێ ئەکادیمی و پەروەردەیی): ژ لایێ م. بدر جمال (مامۆستایێ پشکا دەروونناسیێ) ڤە هاتە پێشکێشکرن، کو باس ل دلتەنگییا خواندنێ ل دەڤ قوتابیان و چەوانیا ئاڤاکرنا “بەرگرییا دەروونی” د ناڤ دەزگەهێن فێرکرنێ دا کر.