پشكداریا سەرۆكێ زانكویا جیهان-دهۆك ل كۆنگرێ زانكویێن دیجیتالی ل جیهانا عەرەبی

بەرێز پ.د.زێرڤان عبدالمحسن أسعد، سەرۆكێ زانكویا جیهان-دهۆك، دگەلدا بەرێز (پ.د.أومید فریق فتاح) سەرۆكێ زانكویا جیهان-سلێمانی، پشكداربوون ل رۆژا ئێكێ یێ كۆنگرێ (زانكویێن دیجیتالی یێن جیهانا عەرەبی) كو دهێتە برێڤەبرن ل مەسقەت - عمان ل رێكەفتی (16 تا 2025/9/18)، ژلایێ دەزگایێ تایمز یا بریتانی یێ خواندنا بالا ب هەماهەنگی دگەل وەزارەتا خواندنا بالا و ڤەكۆلین و داهێنانێ ل عەمان كو ل زانكویا عەرەبی یا ڤەكری دهێتە ئەنجامدان.

ل رۆژا ئێكێ یا كۆنگرەی پتر ژ (300) پسپۆر و سەركردێن خواندنا بالا ل جیهانێ پشكداربوون، ژ وان سەرۆك زانكو، ڕاگر، رێڤەبەرێن سەنتەرێن ڤەكۆلینان، پسپۆرێن گۆهرینێن دیجیتالی، ژبلی زێدەتری ژ (70) پەیڤدار و پسپۆرێ تایبەتمەند د بوارێ پرسێن زیرەكیا دەستكرد دا، فێربوونا تێكهەل، و رێڤەبرنا زانكویێن دیجیتالی.

 پشكداریا سەرۆكێ زانكویا جیهان-دهۆك د ڤێ چالاكیێ دا ڤەدگەریت بۆ ڕژدی و پشتەڤانیا زانكویێ بۆ بەردەوامی و پێشڤەچوون و خۆگۆنجاندن دگەل كاروانێ ئەكادیمی لسەر ئاستێ جیهانا عەرەبی و نیڤدەولەتی، زێدەباری درۆستكرنا پرێن هەڤكاریێ دگەل سازیێن ب ناڤ و دەنگ د بوارێ فێركرنا دیجیتالی دا.