ل ڕێکەفتی 24/5/2026، ب ئامادەبوون و دەستپێشخەریا بەرێز (پ.د. زیرڤان عبدالمحسن أسعد) سەرۆکێ زانکۆیا جیهان-دهۆک، کار و چالاکییێن "سێیەمین کۆنفرانسێ هەڵبژارتنا باشترین قوتابیێ سمینارگێڕ" بۆ قوتابییێن قۆناغا ئێکێ ب فەرمی هاتنە ئەنجامدان، ئەڤەش د چارچۆڤێ پشتەڤانیکرن و هاندان بۆ گەنگەشەیێن زانستی و بلندکرنا ئاستێ ئەکادیمی یێ قوتابییان دا تێت.

بۆ ڕێڤەبرن و چاڤدێریکرنا ڤێ بەریکانێ، لژنەکا پسپۆر و تایبەتمەند هاتبوو ڕاسپاردن بۆ هەڵسەنگاندنا سمینارێن قوتابییان، کو تێدا هەڤرکییەکا توند دناڤبەرا قوتابییێن پشکدار دا هەبوو لسەر چەوانیا پێشکێشکرنا باشترین بابەت.

د ڤی کۆنفرانسی دا، جەخت ل ڤان خالان هاتبوو کرن:

🔹 پێشڤەبرن و نیشاندانا شیان و بەهرەیێن گوتاربێژیێ و هۆنەرێ پەیڤینێ.
🔹 پێگیرییکرن ب ئەو ڕێنما، ڕێکار و ئامرازێن زانستی یێن کو قوتابیێن قۆناغا ئێکێ د بابەتێ "گەنگەشەیا زانستی" دا خواندین.
🔹 هەڵسەنگاندنا سمیناران ژ لایێ لژنا سەرپەرشت ڤە لسەر بنەمایێ (10) خالان بوو کو بوارێن: زمانێ لەشی (Body Language)، تەکنۆلۆجیا، ناڤەڕۆکا بابەتی، کۆنترۆڵکرن و بەهرەیێن گەیاندنا زانیارییان ب خۆڤە دگرتن.

ل دووماهییا ڤی کۆنفرانسی، باوەرنامێن پشکداربوونێ دێ هێنە پەخشین، دگەل پێشکێشکرنا خەڵاتێن ڕێزلێنانێ بۆ ئەو قوتابییێن کو پلەیێن ئێکێ بدەستڤە دئینن.