ئەڤرۆ رێکەفتى (6/3/2021) سەنتەرێ ڤەکولین و راوێژکارى ل زانکویا جیهان-دهوک ب ئامادەبوونا بەرێز (پروفیسورێ هاریکار د.زیرڤان عبدالمحسن أسعد) سەرۆکێ زانکویێ گەنگەشەکا ڤەکرى ل سەر شێوازێ ئونلاین ل ژێر ناڤ و نیشانێن (گرنگیا سەرەدانا پاپایێ ڤاتیکانێ بۆ عیراقێ).
کو ژ سێ تەوەرێن گرنگ پێک دهات:
تەوەرێ ئێکێ: ئاستێ پەیوەندیێن دبلوماسى دناڤبەرا عیراقێ و ڤاتیکان، کو هاتە گەنگەشە و شروڤەکرن ژلایێ بەرێز (د.عمر بەرزنجى) بالیوزێ بەرێ یێ عیراقێ ل ڤاتیکان ل پایتەختێ ئیتالیا رۆما، هەروەسا بریکارێ وەزیرێ دەرڤە یێ عیراقێ ل سالا 2016ێ و نوکە بالیوزێ وەلاتێ عیراقێ یە ل قەتەر.

تەوەرێ دووێ: (ئەنجامێن سەرەدانا پاپایى  و رەنگەڤدانا وێ لسەر عیراقێ لدۆر چارەکرنا ململانێن نافخۆ)، کو ژلایێ بەرێز (پروفیسور د.محمد احسان) تایبەمەندێ بوارێ سیاسەتا نیڤدەولەتى و هەلگرێ باوەرناما دکتورایێ ژ زانکویا ئکسفورد و وەزیرێ بەرێ یێ مافێ مرۆڤ ل حکومەتا هەرێما کوردستانێ هاتە باسکرن، و نوکە ماموستایە ل کولیژا جەنگى ل زانکویا لەندەن.
تەوەرێ سێ: دەرگەهێ گەنگەشێ و دانوستاندنێ دناڤبەرا بەشداربوویان هاتە ڤەکرن.

د ناڤەرۆکا گەنگەشا ڤەکرى دا، بەرێز (د.عمر بەرزنجى) کورتیە ل دۆر مێژوویا دەستپێکرنا پەیوەندیێن دبلوماسى دناڤبەرا عیراقێ و ڤاتیکان باسکر، ژلایێ خوڤە ئاماژە ب وێ چەندێ کر کو ڤاتیکان ئێکەم کەس دەستنیشانکرن وەکو هنارتی ل عیراقێ ڤەدگەریت بۆ سالا 1922ێ کو سەرۆکێ قەشەیان (فرانسوا دی بیرى)بوو، هەروەسا ل سالا 1966ێ (بالیوزێ پاپایى) وەکو هنارتیێ ڤاتیکان هاتە دانان ل کومارا عیراقێ کو (بول ماری موریس بیرین) بوو، لێ وەلاتێ عیراقێ ئێکەم بالیوز وەکو هنارتیێ عیراقێ ل سالا 1966ێ هاتە دانان ئەو ژى بەرێز (هاشم خلیل) بوو.
هەروەسا ژلایێ خوڤە بەرێز (د.عمر بەرزنجى) ئاماژە ب رێکەفتناما لێکتێگەهشتنێ کر دبوارێ هەڤکاریا گەشتوگوزارى دا دناڤبەرا وەلاتێ عیراقێ و ڤاتیکان، کو ل رێکەفتى (27/3/2014)ێ رێکەفتنامەکا لێکتێگەهشتنێ دناڤبەرا هەردوو وەلاتان هاتە ئیمزاکرن ب هەماهەنگى دگەل دەزگایێ حەجا کریستیانى (ORP)، هەروەسا باس ل سەرەدان و هەڤدیتنێن فەرمى یێن هەردوو وەلاتان هاتە کرن بتایبەت پشتى سالا 2003ێ.
ژ لایەکێ دى ڤە باس ل رول و پێگەهێ ڤاتیکان هاتە کرن دەربارەى پەیوەندیان دگەل عیراقێ، نموونە بەرێز (کاردینال بیترو) سەرۆک وەزیرێن ڤاتیکان سەرەدانا وەلاتێ عیراقێ کر دناڤبەرا 24-27/12/2018.  

تەوەرێ دووێ ژلایێ بەرێز (د.محمد احسان) هاتە گەنگەشەکرن ل دۆر ئاستێ کارتێکرن و گرنگى یا سەرەدانا پاپایى بۆ عیراقێ و چارەکرنا ململانێن نافخو، ژبەرکو تیرورێ ل عیراقێ هەمى پێکهاتێ جڤاکى کرینە ئارمانج، لەوما فەرە ئەڤ سەرەدانە ب دەرفەت بهێتە زانین ژ بۆ گوهرینا ئەڤ وێنە و دیتنا رەشبین لسەر عیراقێ بۆ کومەگەهێ نیڤدەولەتى بهێتە گوهرین، لەوما بەرێز (د.محمد احسان) ئاماژە ب وێ چەندێ کر کو  سەرەدانا بەرێز (پاپا فرانسیس) بۆ عیراقێ گرنگترە ژ سەرەدانێن سەرۆکێن وەلاتێن زلهێز مینا (روسیا، فەرەنسا، ویلایەتێن ئێکگرتى یێن ئەمریکا) ژبەر گرنگى و پێگەهێ بهێز یێ پاپایى لسەر ئاستێ جیهانێ، هەروەسا جەخت ل کەلتورێ بەرچاڤ یێ پێگڤەژیانا ئولى و نەتەوەیى یێ عیراقێ کر، کو ئەڤ فرە ئایین و نەتەوەیى یە ژێدەرێ هێزێ یە بۆ عیراقێ دگەل پاراستنا ناسنامە و پەیداکرنا هەست ب هەبوونێ یە ژلایێ هەمى پێکهاتێن عیراقێ، و هاولاتیبوون ژ هەر تشتەکى گرنگترە.
هەروەسا باس ل رولێ گرنگ یێ کەسانێن ئەکادیمى و پسپور هاتە کرن کو خالەکا هەڤپشک هەمیان ب ئێک گیان گرێ ددەت کو هاولاتیبوونە لەوما فەرە ب رێیا سەنتەرێن ڤەکولینا ل زانکو و سازیێن خواندنێ پتر رولێ خۆ بگێرن بۆ پاراستنا گیانێ پێگڤەژیان ولێبورینێ دناڤبەرا گشت پێکهاتان.

هەروەسا ژلایێ خۆ بەرێز (پروفیسورێ هاریکار د.زیرڤان عبدالمحسن ڕسعد) سەرۆکێ زانکویێ دەستخوشى ل بەشداربوویان کر و جەخت ل پرسیارەکێ کر، ئایا رەنگڤەدانا سەرەدانا پاپایى لسەر گرنگى یا ئابورى چى یە؟، هەروەسا ئەگەر چنە کو گەلێ عیراقێ ژ بۆ ڤەدیتنا چارەسەریان پەنایێ دبەتە دەرڤەى وەلاتى؟
ل دوماهیێ دەرگەهێ دانوستاندنێ ژ بۆ بەشداربوویان هاتە ڤەکرن و چەندین تەوەرێن گرێدایى بابەتى هاتنە گەنگەشەکرن، کو پتر رویەکێ زانستى و دەولەمەندکرنا زنیاریان بوویە بۆ ڤێ گەنگەشێ.
جهێ ئاماژە پێدانێ یە رێکخستن و رێڤەبرنا گەنگەشا ڤەکرى هاتە ئەنجامدان ژلایێ بەرێز (د.نوار سەعدى) رێڤەبەرێ سەنتەرێ ڤەکولین و راوێژکارى ل زانکویا جیهان-دهوک.