ل رێکەفتى (22/9/2021) ب ئامادەبوونا بەرێز سەرۆکێ زانکویا جیهان-دهوک بەرێز (پرۆفیسورێ هاریکار د.زیرڤان عبدالمحسن أسعد) کومبوونەک دگەل نوینەرێن گروپێن گشت بەشێن زانستى یێن زانکویێ هاتە ئەنجامدان ب پشکداریا بەرێز (فرهنگ طیار) بەرپرسێ لژنا زانکویا جیهان یا ئێکەتیا قوتابیێن کوردستانێ، ژلایێ خۆ بەرێز سەرۆکێ زانکویێ ئاماژە ب چەند تەوەرێن گرنگ کرن، ل دەستپێکێ پیرۆزباهى ل گشت ئامادەبوویان کر ب هەلکەفتا سالا نوى یا خواندنێ و هیڤیا سەرکەفتن و بەردەوامیێ بۆ گشت قوتابیان خواست، و رۆل و پێگەهێ لژنا قوتابیان و نوینەران بەرز نرخاند ژ بۆ گەهاندنا داخوازى و گلە و گازندێن قوتابیان بۆ بەشێن زانستى، هەروەسا سەرۆکێ زانکویێ خواست کو فەرە نوینەر ببنە نموونا زیرەکى و سەرکەفتنێ دناڤا قوتابیاندا بۆ هندێ ببیتە هاندەرەک بۆ گشت قوتابیان، هەروەسا جەخت ل جێبەجێکرنا رێنمایێن خۆ پاراستنێ کر و دانانا ڤاکسین و بکارئینانا ماسکى، د تەوەرەکێ دى دا باس ل گرنگى دان ب شیان و بەهرەیێن قوتابیێن داهێنەر کر ژ بۆ نیشاندانا بەرهەم و بزاڤ و چالاکیێن (زانستى، رەوشەنبیرى، هونەرى، وەرزشى،...) ب رێیا پێشکێشکرن وبەشدارى کرن د سمینار و ورک شوپ و بەریکانە و سەرەدان و گەشتێن زانستى.
ل دوماهیێ جەخت ل وێ چەندێ کر کو دەرگەهێن بەش و رێڤەبەرى و یەکەیێن زانکویێ د ڤەکرینە ل هەمبەر قوتابیان بۆ وەرگرتنا هەر هزر و بووچوون و دەستپێشخەریەکێ ب مەرەما خزمەتکرنا قوتابیان د بوارێن جودا جودا دا.