ئەڤرۆ ڕۆژا پێنجشەمبى ڕێکەفتى 23/7/2026، ب ئامادەبوونا ڕێزدار (د. نەوزاد یحیى باجگر) سەرۆکێ دەستەیا ئەمینداریا زانکۆ و پەیمانگەهـ و قوتابخانێن جیهان، شاندەکێ زانکۆیا جیهان-دهۆک ب سەرۆکاتیا ڕێزدار (پ. د. زێرڤان عبدالمحسن أسعد) سەرۆکێ زانکۆیێ، پشکداری د ڕێوڕەسمێن ڕاگه‌هاندن و ناساندنا "دەستەیا وەبەرهێنانا ڤەکۆلینان" دا کر، ب بەرهەڤبوونا سەرۆک و هاریکارێن سەرۆکێن زانکۆیێن کۆمەڵگەها جیهان و ئالیێن پەیوەندیدار.

د ئەڤێ ڕێوڕەسمێ دا، ڕێزدار سەرۆکێ زانکۆیا جیهان-دهۆک جەخت ل سەر گرنگیا ئەڤی ناڤەندێ کر بۆ پشتەڤانیکرنا ڤەکۆلینێن زانستی و ڤەگوهاستنا وان بۆ پڕۆژەیێن وەبەرهێنانێ و بکارئینانا وان د بوار و سێکتەرێن جودایێن ژیانێ دا. هەروەسا ئاماژە ب ڕۆلێ بەرچاڤێ دەزگەهێ "زەکاتا زانستی" کر د جێبەجێکرنا بڕگە و بەرنامەیێن خۆ یێن خۆبەخشی و هۆشیارکرنا تەخ و چینێن جودایێن جڤاکی دا. زێدەباری ئەڤێ چەندێ، باس ل پلانا زانکۆیێ بۆ پێشوازیکرن و ئامادەکاریێن سالا نوو یا خواندنێ (2026-2027) کر.